Ihuriro Alliance Fleuve Congo rirwanya ubutegetsi bwa Perezida Felix Tshisekedi wa Repubulika ya Demokarasi ya Congo, riravuga ko bitandukanye nk’uko byagenze nyuma y’ifatwa ry’Umujyi wa Goma, umurwa mukuru wa Kivu y’Amajyaruguru, nta mucanshuro uzongera gusohoka mu mutekano muri iki gihugu nyuma y’uko bakomeje gukoreshwa mu kugaba ibitero ahantu hatuwe cyane.
Mu itangazo ryashyizwe ahagaragara kuri X kuri iki Cyumweru nimugoroba, AFC yavuze ko imenyesha igihugu ndetse n’amahanga ko kurenga ku ihagarikwa ry’imirwano bikorwa n’ihuriro ry’ingabo z’ubutegetsi bwa Kinshasa rikomeje.
AFC yanditse iti: “Kuva saa sita (12h00) kuri iki Cyumweru, itariki ya 24 Kanama 2025, izo ngabo, zigizwe n’abacanshuro b’abanyamahanga, ziri kugaba igitero cyibasiye uturere dutuwe cyane twa Kadasomwa no mu nkengero zaho, ndetse n’ibirindiro byacu”.
Yongeyeho ko ibi bitero byahitanye abantu benshi ndetse bituma abandi benshi bava mu byabo bahunga ibisasu biri guterwa n’indege zitagira abapilote.
