Abaturage bo mu murenge wa Kinigi, mu kagari ka Kampanga, mu karere ka Musanze baravuga ko batewe igihombo gikomeye nyuma y’aho ubuhunikiro bw’imbuto y’ibirayi bwari bubitse umusaruro wabo bufashwe n’inkongi y’umuriro bukagurumana bukarushya kuzimwa.
Amakuru atangwa n’ababonye ibyabaye avuga ko iyi nkongi yatangiye mu masaha ya nijoro, aho abaturage bahise batabara bagerageza kuzimya ariko umuriro wari umaze gufata ahantu henshi, ibintu byinshi birakongoka. Ubuhunikiro bwari bubitse ibirayi by’abaturage bo muri ako gace, ari nabyo bibabaje cyane kuko byari byitezweho kubafasha kubona inyongeramusaruro no gucuruza bakiteza imbere.
Umwe mu baturage yagize ati: “Byadusigiye igihombo gikomeye cyane. Twari twizeye ko imbuto twabikije ari zo tuzatera mu gihe kiri imbere no kugurisha tukabona amafaranga, none byose byakongotse mu kanya nk’akanya.”
Ku ruhande rwa Polisi y’u Rwanda mu Ntara y’Amajyaruguru, yatangaje ko icyateye iyi nkongi gishobora kuba gifitanye isano n’umuriro w’amashanyarazi, ikaba yahise isaba abaturage kugira amakenga no kujya bitabaza inzobere mu gihe cyo gukoresha cyangwa gusudira insinga z’amashanyarazi.
Kuri ubu abaturage basaba inzego bireba kubafasha kubona ubundi buryo bwo kongera kubona imbuto y’ibirayi, kuko bavuga ko batabaye bagira imbogamizi mu gihe cy’ihinga rigiye gukurikiraho.
