Amakuru agera ku bitangazamakuru aravuga ko abahanzi bakunzwe Ariel Wayz na Babo batawe muri yombi n’inzego z’umutekano, bakurikiranyweho gukoresha ibiyobyabwenge ndetse no kutishyura facture.
Iyi nkuru yatangajwe bwa mbere na Brainer abinyujije ku rukuta rwe rwa X (Twitter), aho yemeje ko bombi bafashwe nyuma yo kugaragarwaho imyitwarire idahwitse. Kugeza ubu iperereza riracyakomeje kugira ngo hamenyekane neza imiterere y’iki kibazo.
Nyamara kandi, hari andi makuru avuga ko Ariel Wayz na Babo bari bamaze iminsi bakorana umushinga w’indirimbo nshya na K8 Kavuyo, indirimbo izaba yitwa Remera Godiary. Byatangajwe ko Kavuyo ubwe ari we wabahamagaye abasaba gusubiramo indirimbo ye yitwa Nkonogo, ariko ntibabyumvikanyeho neza. Byakomeje guhwihwiswa ko ubwo bahuriye mu kabari i Remera, mu biganiro byabo havuyemo amagambo ajyanye n’iyo ndirimbo, bikaba byaraje guhurirana n’uko bafashwe.
Ibi byose byateje urujijo mu bakunzi b’umuziki nyarwanda, bamwe bakibaza niba koko ibyo byaha babashinja bifitanye isano n’akazi kabo ka muzika cyangwa niba ari ibindi bibazo by’ubuzima busanzwe. Ariko icyagaragaye cyane ni agahinda n’akababaro k’abafana babo babona amazina akomeye mu muziki nyarwanda ajyanishwa n’ibibazo nk’ibi.
