Nyuma y’amashusho yakwirakwijwe ku mbuga nkoranyambaga, agaragaza abasore batatu batega umukobwa mu mujyi wa Kigali bakamukubita ndetse bakanamwambura ibyo yari afite, Polisi y’u Rwanda yahise itangira gukurikirana aba bagizi ba nabi.
Aba basore bose bamaze gutabwa muri yombi. Iyi nkuru yakongeje impaka mu baturage benshi basaba ko abagizi ba nabi nk’abo bahanwa by’intangarugero, bityo abandi bakaboneraho isomo. Amategeko y’u Rwanda ahamya neza ibyo umuntu ahanirwa mu gihe akoze icyaha nk’icyo cy’ubujura cyangwa se cyo gukubita no gukomeretsa undi.
Ibyaha by’ubujura
Itegeko riteganya ko umuntu wese uhamijwe n’urukiko icyaha cy’ubujura ahanishwa:
- Igifungo kitari munsi y’umwaka umwe ariko kitarenze imyaka ibiri
- Ihazabu y’amafaranga y’u Rwanda atari munsi ya miliyoni imwe (1,000,000 Frw) ariko atarenze miliyoni ebyiri (2,000,000 Frw)
Uretse ibyo, urukiko rushobora gutegeka uwagihamijwe gukora imirimo y’inyungu rusange mu gihe cy’amezi atandatu.
Ibyaha byo gukubita no gukomeretsa ku bushake
Umuntu wese ukubita, ugasagarira cyangwa ugakomeretsa undi ku bushake aba akoze icyaha. Iyo urukiko rwemeje ko ibyo byabaye, igihano kiba:
- Igifungo kitari munsi y’amezi atandatu (6) ariko kitarenze umwaka umwe (1)
- Ihazabu iri hagati ya 100,000 Frw na 300,000 Frw
Iyo ingaruka ziba zikomeye
Mu gihe gukubita cyangwa gukomeretsa byateye uwakorewe icyaha:
- Indwara idakira
- Ubumuga buhoraho
- Kubura burundu urugingo rw’umubiri gukora
- Cyangwa gutakaza igice cy’umubiri
Uwabigizemo uruhare ahanishwa igifungo kitari munsi y’imyaka itanu (5).
Ibi bihano biteganywa mu rwego rwo kurengera ubuzima n’umutekano by’abaturage, kurwanya ubugizi bwa nabi no kwigisha ko nta cyaha na kimwe kigomba kwihanganirwa.
