Ibi bizakorwa mu rwego rwo gutegura no kwakira neza isiganwa rya Shampiyona y’Isi y’Amagare (UCI Road World Championships), rizitabirwa n’ibihugu bitandukanye byo ku isi.
Ubu bufatanye bugamije kwirinda ko irushanwa ryagira ingaruka ku mutekano ndetse n’imigendekere y’imyigire y’abanyeshuri. Minisiteri ivuga ko amasomo azasubukurwa nk’uko bisanzwe ku wa mbere tariki ya 29 Nzeri 2025.
Ibikubiye mu itangazo ryasohowe kuri uyu wa kabiri; Amashuri yose yo mu Mujyi wa Kigali azafungwa by’agateganyo hagati ya tariki 21–28 Nzeri 2025.
Amasomo azasubukurwa ku itariki ya 29 Nzeri 2025. Iminsi abanyeshuri bazamara batiga izasimbuzwa nyuma kugira ngo hatabaho igihombo cy’amashuri.
Abanyeshuri bazakomeza kwigishwa binyuze mu ikoranabuhanga n’imyitozo yihariye igamije kubafasha.
Ababyeyi n’abanyeshuri barasabwe gukoresha umwanya bafite mu kwiga no kwitabira ibijyanye n’amagare, harimo n’isomo ryihariye rihabwa abanyeshuri ryerekeye uyu mukino.
Minisiteri y’Uburezi isaba ababyeyi gufasha abana babo gukomeza imyigire no gukoresha neza uyu mwanya, ariko inabibutsa ko ari amahirwe yo kwiga byinshi ku mikino y’amagare no ku rwego mpuzamahanga.
Iri rushanwa ryitezweho kuzamura isura ya Kigali nk’umujyi ucyeye ushobora kwakira amarushanwa akomeye ku isi, ndetse rikazafasha no mu guha abanyeshuri isomo ryihariye rihuriza hamwe uburezi, imyidagaduro n’imikino.
