Umunyezamu wa Rayon Sports FC, Drissa Kouyaté, yajyanwe kwa muganga na ambulance nyuma yo kugwa mu muferege uri inyuma ya Kigali Pele Stadium, ahazwi nko kwa Thomas, ari naho amakipe asohokera. Ibi byabaye nyuma y’umukino ikipe ye yari imaze gutsindwamo na Singida Black Stars yo muri Tanzania.
Uyu mukino wabereye kuri uyu wa Gatandatu, tariki ya 20 Nzeri 2025, wari uwa mbere w’ijonjora ry’ibanze rya CAF Confederation Cup. Rayon Sports yakiniye imbere y’abafana bayo ariko itsindwa igitego 1-0, ishyirwa mu bibazo bikomeye mbere y’uko ijya gukina umukino wo kwishyura.
Kouyaté wari umaze gufatanya na bagenzi be muri uyu mukino, nyuma yo kuva mu kibuga ni bwo yagize ikibazo cyamugushije mu muferege, bituma bahita bamwitabaza bamushyira mu modoka ya ambulance imujyana kwa muganga ngo ahabwe ubuvuzi bwihuse.
Umukino wo kwishyura uteganyijwe ku wa Gatandatu tariki ya 27 Nzeri 2025 i Dar es Salaam muri Tanzania. Ikipe izakomeza hagati ya Rayon Sports na Singida Black Stars, izahura n’izakomeza hagati ya Flambeau du Centre yo mu Burundi na Al Akhdar yo muri Libya.
Kuri ubu, Flambeau du Centre yabonye intsinzi mu mukino ubanza, itsinda Al Akhdar ibitego 2-1 mu Burundi, bituma byose bizamenyekana mu mikino y’amakipe azakina ku munsi wa 27 Nzeri 2025.
Inkuru ikomeje guhwihwiswa ni uko Rayon Sports izasabwa gukora ibishoboka byose mu mukino wo kwishyura kugira ngo igarure icyizere imbere y’abafana bayo, mu gihe kandi ubuzima bwa Kouyaté burimo gukurikiranwa n’abaganga.
