Mu mihanda yo mu Mujyi wa Kigali hakomeje kubera ibirori by’isiganwa ry’amagare ry’Isi, aho abaturage batandukanye bakomeje kugaragaza urugwiro n’urukundo bafitiye uyu mukino. Ariko kimwe mu byagarutsweho cyane ku mbuga nkoranyambaga ni uburyo abapolisi bo mu ishami rishinzwe umutekano wo mu muhanda bitwaye ku mwana muto wari waje gushyigikira abakinnyi.
Uyu mwana wari wambaye imyenda y’umutuku, ugaragara nk’uri mu kigero cy’imyaka 6 cyangwa 7, yabonetse mu mashusho ari kumwe n’abapolisi, aho yabatereraga amasari (salute) nabo bakamusubiza mu buryo bwuje urugwiro. Uko kuganira kwabo kudasanzwe kwatumye benshi bifuza kureba videwo inshuro nyinshi, kuko kwagaragaje ishusho y’ubupolisi bw’u Rwanda buteganye n’abaturage.
FT: RAYON SPORTS 4:1 SINGIDA BLACK STARS
Amashusho y’ibi bihe byiza yakwirakwijwe ku mbuga nkoranyambaga, abantu benshi bagaragaza ko byabashimishije ndetse binabakangura amarangamutima. Hari abagaragaje ko uburyo abapolisi babanye neza n’abaturage, cyane cyane abana, ari igisobanuro gikomeye cy’uko umutekano n’ubuzima bw’imibereho myiza y’abaturage bishyirwa imbere.
Abantu batandukanye bagize icyo babivugaho, bamwe bakavuga ko ari urugero rwiza rugaragaza ko umupolisi atari umuntu utandukanye n’abandi baturage, ahubwo ari inshuti, umurinzi ndetse n’umufasha wabo mu buzima bwa buri munsi.
Uyu mwana yabaye akadomo ku birori by’amagare, kuko uburyo yishimanye n’abapolisi bwagaragaje ko ibirori nk’ibi bitanga akanya ko guhuza abantu bose, uhereye ku bana bato kugeza ku bakuru, kandi bikongera kumvisha benshi ko gukunda igihugu no kugishyigikira ari ibintu bitangirirwa hakiri kare.
