Rayon Sports WFC igiye gukina umukino w’amateka mu irushanwa rya CECAFA, mu gihe yawutsinda ikaba yahabwa ibihumbi 150$ [arenga miliyoni 215 Frw] yo kwitabira CAF Women’s Champions League.
Ku mugoroba wo kuri uyu wa Kabiri, tariki ya 16 Nzeri 2025, Rayon Sports y’Abagore irakina umukino wa nyuma wa CECAFA uza kuyihuza na JKT Queens yo muri Tanzania.
Ni umukino Rayon Sports WFC igomba gukora ibishoboka byose ikabona itike ya y’imikino ya nyuma ya CAF Women’s Champions League, kuko byayihesha guhita ibona ibihumbi 150$.
Aya mafaranga ahabwa ikipe iba yitabiriye iri rushanwa ritegurwa n’Ipuzamashyirahamwe y’Umupira w’Amaguru muri Afurika (CAF), ikaba iya kane mu itsinda.
Mu gihe Rayon Sports WFC yarenga JKT Queens ikagera mu matsinda na yo ikayitwaramo neza, yaba ifite amahirwe yo kurenza amafaranga yagenerwa kuko yitabiriye.
Ikipe yegukanye CAF Women’s Champions League ihabwa ibihumbi 600$, iya kabiri igahabwa ibihumbi 400$, iya gatatu igahabwa ibihumbi 350$, mu gihe iya kane ihabwa ibihumbi 300$.
Ikipe inanirwa kurenga amatsinda ntiboneke muri abiri ya mbere ahubwo ikaba iya gatatu, ihabwa ibihumbi 200$.
Ubuyobozi bw’iyi kipe ihagarariye u Rwanda bwari bwatangaje ko bwayigeneye miliyoni 3 Frw z’uko yageze muri 1/2, mu gihe hari n’andi asaga miliyoni 3 Frw igomba kubona kubera kugera ku mukino wa nyuma.
