Umuyobozi wa SK FM, Sam Karenzi, yatangaje inkuru nshya yishimirwa cyane mu ruganda rw’itangazamakuru, nyuma yo kwakira abanyamakuru babiri bashya bagiye gufatanya n’itsinda rye mu biganiro by’imikino.
Abo banyamakuru bashya ni Ndahayo Patrick, wahoze akorera kuri Radio Salus, na MC Van Shaffy, wakoreraga kuri Isibo Radio/TV. Bombi bazwiho impano ikomeye mu kogeza umupira no gutanga amakuru y’imikino mu buryo buryoheye abakunzi bayo.
FT: RAYON SPORTS 4:1 SINGIDA BLACK STARS
Mu kiganiro Sam Karenzi yagiranye n’abanyamakuru, yavuze ko intego yo kubazana ari ugushimangira gahunda ya SK FM yo kuba urubuga rukomeye mu gusakaza amakuru y’imikino mu Rwanda. Yagize ati:“Aba basore bazadufasha cyane mu kogeza imipira yo muri shampiyona y’u Rwanda ndetse n’iyo ku mugabane w’u Burayi. Dushaka ko abafana b’imikino bumva ko SK FM ari radio yabo, ihora ibagezaho amakuru yizewe kandi atavangura.”
Ndahayo Patrick na MC Van Shaffy bazajya bakorana n’itsinda risanzwe rigizwe na Cedric Keza, Synthia Naissa, Allan Ruberwa, na Traore, bose bazwiho ubunararibonye mu gukurikirana imikino itandukanye haba mu gihugu no hanze.
Abakunzi ba SK FM barategereje kureba uko iyi mpuzandengo y’ubushobozi n’ubunararibonye izahindura uburyo iyi radiyo ikomeza kuyobora ibiganiro by’imikino mu Rwanda.
