Imirwano ikomeye yatangiye mu gitondo cyo kuri uyu wa Gatatu, tariki ya 23 Mata 2025, mu karere ka Fizi, mu Ntara ya Kivu y’Epfo, aho abarwanyi b’umutwe wa Wazalendo bafatanyije n’ingabo za Leta ya Repubulika Iharanira Demokarasi ya Congo (FARDC) barwana n’inyeshyamba za AFC-M23/Twirwaneho.
Iyi mirwano iri kubera ahanini mu duce twa Lugezi, Badinzi na Sabuni, aho harangwamo urusaku rukabije rw’amasasu n’ibisasu bikomeye. Amakuru aturuka aho imirwano iri kubera avuga ko impande zombi ziri gukoresha intwaro ziremereye, harimo imbunda za rutura, ibisasu bya RPG, n’ibindi bikoresho by’intambara. Abaturage bo muri utu duce batangaje ko bahungiye mu mashyamba no mu bice byegereye Uvira na Baraka kugira ngo barokoke.
Imirwano hagati y’izi mpande zombi ikomeje gufata indi ntera nyuma y’uko umutwe wa M23 ushinjwa kwagura ibikorwa byawo mu burasirazuba bwa Congo, aho ushinjwa kugaba ibitero kuri za position za FARDC ndetse no kwigarurira ibice byari bisanzwe biri mu maboko y’imitwe y’abarwanyi ba Wazalendo.
Umutwe wa Wazalendo ugizwe ahanini n’abaturage bitwaje intwaro biyemeje kurwanya M23 n’abandi barwanyi bashinjwa guhungabanya umutekano. FARDC ikomeje gutangaza ko ihagaze neza kandi ikomeje gufatanya n’izi ngabo z’inkoramaraso mu guhashya inyeshyamba.
Imiryango iharanira uburenganzira bwa muntu irasaba impande zose guhagarika imirwano no kurinda abasivile, dore ko hari impungenge zikomeye z’ihungabana ry’ubuzima bw’abaturage, cyane cyane abagore n’abana. Hari kandi ubwoba ko iyi mirwano ishobora gukomeza gukaza umurego no mu tundi turere twa Kivu y’Epfo no mu Majyaruguru yayo.
Ubutumwa buheruka gutangwa n’intumwa za MONUSCO, Umuryango w’Abibumbye ushinzwe kugarura amahoro muri Congo, bwasabye ko hakorwa ibiganiro bigamije guhosha intambara no gushakira umuti w’igihe kirekire ikibazo cy’umutekano mucye mu Burasirazuba bwa Congo.
