Intambara ikaze hagati ya AFC/M23 na Wazalendo muri Masisi na Walikale.
Masisi, tariki ya 25 Mata 2025
Imirwano ikomeye yongeye kubura hagati y’inyeshyamba za AFC/M23 n’ingabo za Wazalendo kuva saa cyenda z’ijoro kuri uyu wa Gatanu, ahitwa Kasopo na Kinyumba, ku mupaka wa Masisi na Walikale. Aha ni hafi ya Nyabiondo ku muhanda Nyabiondo-Mutongo-Pinga.
Abaturage baho batangiye kugira ubwoba bukabije kubera amajwi y’imbunda ziremereye n’izoroheje yumvikanye muri utwo duce.
Ibi bibaye nyuma y’aho, ku wa Kane tariki 24 Mata, Wazalendo bashinjaga AFC/M23 kubagabaho igitero mu gace ka Burubi hafi ya Mutongo, ndetse no kugerageza kugaba igitero ku muhanda Mutongo-Lwibo.
Igitangaje ni uko iyi mirwano ibaye umunsi umwe gusa nyuma y’itangazo ryasinywe hagati ya Leta ya Congo n’AFC/M23 rivuga ko bagiye kugerageza amahoro binyuze mu biganiro.
Ku rundi ruhande, amakuru yizewe avuga ko AFC/M23 yatangiye kuva mu gace ka Kibati mu karere ka Walikale, berekeza Kashebere ku mupaka wa Masisi, ariko ntibiramenyekana neza impamvu yabateye guhava. Hari abakeka ko byatewe n’igitutu cya Wazalendo.
