Mu gitondo cyo kuri uyu wa Gatanu, ahagana saa mbili n’igice, habaye impanuka idasanzwe mu murenge wa Nkotsi, mu karere ka Musanze, aho imodoka y’ikigo IHS yaguye mu mukingo munini ariko mu buryo butangaje, nta muntu n’umwe wagize icyo aba.
Iyo modoka y’ubwoko bwa pickup yari itwawe n’umushoferi wari kumwe n’abandi bantu batatu. Bageragezaga kugenda mu muhanda w’igitaka uca mu gace kazwiho kuba gafite imisozi n’ibibaya byinshi, igihe imodoka yanyereraga igahita ijya ku ruhande rw’umuhanda, igwa mu mukingo muremure cyane.
Mu buryo butumvikana neza, imodoka yahagaze hagati y’umukingo, imbere n’inyuma byayo bidashinze ku butaka, isa n’iyimanitswe hagati y’ikirere n’ubutaka. Ababonye uko byagenze bemeza ko ari igitangaza cy’Imana. Umwe mu baturage witabiriye ubutabazi yagize ati:“Twari dutangiye gutekereza ko twabonye urupfu rw’abantu, ariko dusanze bose bari bazima. Urumva ko ari Imana yabakingiye.”
Abaturage n’abatwara imodoka b’aho hafi bahise bihuriza hamwe kugira ngo barokore iyo modoka mu buryo butekanye, birinda ko yakomeza kugwa ikongera guteza impanuka. Abaturage bemeza ko uwo muhanda wanyuzwagamo iyo modoka ugomba kongera kwitabwaho, cyane cyane muri ibi bihe by’imvura.
Abari bari mu modoka bahise batwarwa kwa muganga kugira ngo basuzumwe, nubwo ntawe warimo wagize igikomere cyihariye.
Iyi nkuru irongera kwerekana akamaro ko kwirinda no kwiragiza Imana igihe cyose, cyane cyane mu ngendo. Imana yagaragaje uburinzi bwayo, inakomeza gutanga ubutumwa bwo gukangurira abantu gufata ingamba zo gukoresha neza imihanda no kuyitaho.
