Urukiko rw’Ibanze rwa Kicukiro rwahamije Mahoro Rwema Pascal, wamamaye cyane ku mbuga nkoranyambaga no kuri YouTube, ibyaha byo kwihesha ikintu cy’undi hakoreshejwe uburiganya no kuba umuhemu. Rwema yakatiwe igifungo cy’imyaka itanu n’ihazabu ya miliyoni 3,5 Frw.
Rwema yatawe muri yombi ku wa 6 Kanama 2024 nyuma y’uko abantu batandukanye baregeye Urwego rw’Igihugu rw’Ubugenzacyaha (RIB). Urukiko rwamuhamije ibyo byaha, rutegeka ko agomba no kwishyura indishyi ku bantu yahuguje umutungo.
Urukiko rwanzuye ko Rwema yishyura Rugaba Emmerance miliyoni 40 Frw, Barihamwe Cyprien miliyoni 18 Frw, Munyengabe Syvestre miliyoni 13 Frw, Hatangimbabazi Vincent miliyoni 2,5 Frw, ndetse na Habarugira Justin miliyoni 1,8 Frw. Uretse ibyo, Rwema asabwa gutanga amagarama y’urubanza angana n’ibihumbi 10 Frw.
Icyaha cyo kwihesha ikintu cy’undi hakoreshejwe uburiganya, giteganywa n’ingingo ya 174 y’itegeko riteganya ibyaha n’ibihano muri rusange. Iyi ngingo ivuga ko umuntu wese wihesha umutungo w’undi cyangwa igice cyawo mu buryo bw’uburiganya aba akoze icyaha.
Ingingo ya 174 iteganya igihano cy’igifungo kiri hagati y’imyaka ibiri n’itatu, ndetse n’ihazabu iri hagati ya miliyoni eshatu na miliyoni eshanu Frw. Iyo icyaha gikozwe hagamijwe inyungu nini nk’impapuro z’inyemezamigabane, igihano kiriyongera kikaba hagati y’imyaka itatu n’itanu n’ihazabu iri hagati ya miliyoni eshanu na miliyoni zirindwi.
Urukiko rwafashe iki cyemezo hashingiwe ku bimenyetso byagaragajwe n’abaregeye RIB ndetse n’uburyo Rwema yakoreshaga uburiganya mu kwambura abantu amafaranga yabo. Iki kibazo cyabaye isomo rikomeye mu kubahiriza amategeko no kwirinda ibikorwa bifitanye isano n’uburiganya.
