WASILI, umwe mu banyamakuru b’imena bazwi mu bijyanye n’imyidagaduro n’imikino, ari mu biganiro bya nyuma n’ikipe ya APR FC kugira ngo agire uruhare rushya muri iyi kipe nk’umuvugizi wayo.
Amakuru yizewe aturuka mu bantu ba hafi y’impande zombi, avuga ko ibiganiro bigeze kure kandi ku buryo nibigenda neza, mu mwaka utaha WASILI azaba yambaye umweru n’umukara, amabara y’umwambaro wa APR FC, nk’umwe mu bayihagarariye mu itangazamakuru.
Biteganyijwe ko WASILI, uzwiho ubuhanga bwo gusobanura no kwamamaza ibikorwa by’amarushanwa n’amakipe atandukanye, azaba afite inshingano zo kuvuga imyato ibikorwa by’ikipe ya APR FC, gutangaza amakuru yayo, ndetse no gufasha mu kubaka isura yayo mu bitangazamakuru no ku mbuga nkoranyambaga.
Ku ruhande rwa WASILI, nubwo nta byinshi aratangaza ku mugaragaro, hari amakuru avuga ko nawe yishimiye amahirwe yo gukorana n’ikipe nk’iyi y’igihangange mu mupira w’amaguru mu Rwanda, ndetse ngo afite inyota yo kuyigeza ku rundi rwego mu bijyanye no kumenyekana.
APR FC, nk’ikipe ikomeye kandi ifite igikundiro mu gihugu, izaba yinjije umuntu ufite uburambe mu itangazamakuru, bityo bikaba bizayifasha kurushaho kwegera abafana no gusakaza ibikorwa byayo mu buryo bwa kinyamwuga.
Harategerejwe kumvwa ku mugaragaro icyo impande zombi zemeje nyuma y’ibiganiro, gusa ibimenyetso byose bigaragaza ko igihe si kirekire WASILI atangira inshingano ze nk’umuvugizi mushya wa APR FC.
