Mu mukino w’ikirarane w’Umunsi wa 27 wa Shampiyona y’Icyiciro cya Mbere mu Rwanda wabereye kuri Stade ya Kigali i Nyamirambo, APR FC yigaragaje itsinda Amagaju FC ibitego 3-1, maze isubira ku mwanya wa mbere ku rutonde rw’agateganyo n’amanota 58.
Uyu mukino wari usobanuye byinshi ku ikipe ya APR FC kuko gutsinda byayihaye amahirwe yo kongera kuyobora shampiyona, imbere ya Rayon Sports ifite amanota 56. APR FC yasabwaga gutsinda kugira ngo yisubize umwanya wa mbere, ibintu yabashije kugeraho mu buryo bushimishije.
Rayon Sports iri ku mwanya wa kabiri izakina na Police FC ku Cyumweru tariki ya 11 Gicurasi, saa Moya z’umugoroba. Uyu mukino na wo uzaba ufite igitutu kinini, kuko uzagira uruhare runini mu guhatana ku gikombe cya shampiyona.
Mu yindi mikino yabaye:
- Marine FC yatsinze Vision FC ibitego 2-1.
- Musanze FC yanganyije na Gasogi United igitego 1-1.
- Mukura VS na Bugesera FC na zo zanganyije igitego 1-1.
Shampiyona irakomeza kugenda iba ishyushye uko igana ku musozo, amakipe ahatanira igikombe ndetse n’andi arwana no kutamanuka.
