SK FM yakiriye Cynthia Naissa nk’umunyamakuru mushya uzakorera mu biganiro by’imikino. Ni umwe mu banyamakuru bakiri bato ariko bafite ubuhanga n’ubushishozi mu itangazamakuru ry’imikino. Naissa aje gufatanya n’itsinda rya SK FM mu gutanga amakuru, isesengura, n’ibitekerezo bishya bizamura urwego rw’ibiganiro by’imikino kuri iyi radiyo.
Naissa yari asanzwe akorera RBA (Rwanda Broadcasting Agency), aho yakoreye igihe kitari gito, yigaragaza nk’umunyamakuru ushoboye mu gukurikirana ibibera mu mikino, cyane cyane mu mupira w’amaguru. Ku SK FM, azaba ari umwe mu bayoboye ibiganiro bikunzwe cyane birimo “Urukiko rw’Ikirenga”, ikiganiro cya mu gitondo gisobanura ibyaranze imikino n’ibiyiteganyirijwe, ndetse na “Extra Time”, ikiganiro cyo ku mugoroba cyibanda ku makuru y’imikino mpuzamahanga, cyane cyane iyo ku Mugabane w’u Burayi.
Ubuyobozi bwa SK FM bwatangaje ko bwishimiye kwakira Naissa, buvuga ko azafasha mu gukomeza kuzamura urwego rw’itangazamakuru ry’imikino kuri iyi radiyo. Naissa nawe yavuze ko yishimiye ubu buzima bushya, yemeza ko yiteguye gutanga umusanzu we mu gususurutsa abafana b’imikino no kugeza ku bakunzi ba SK FM amakuru afitiwe gihamya, anasesenguwe neza.
Abakunzi b’iyi radiyo bategereje kumva uburyo bushya azazana mu biganiro, byitezweho kongera ubushishozi, umuvuduko n’udushya mu kogeza no gusesengura ibibera mu mupira w’amaguru, indi mikino ndetse n’icyerekezo rusange cy’imikino mu Rwanda no hanze yarwo.
