Umutwe wa M23 watangaje ko nta kibazo ubona ku kuba Joseph Kabila Kabange wahoze ari Perezida wa Repubulika Iharanira Demokarasi ya Congo ari mu mujyi wa Goma uri mu maboko yawo, nta kibazo ubibonamo.
Ku wa Gatanu tariki ya 18 Mata ni bwo Kabila yageze i Goma avuye muri Zimbabwe, aho yari amaze igihe yarahungiye.
M23 yigeze kwigarurira Goma hagati ya 2012 na 2013 ubwo Kabila yari ayoboye RDC, nanone iragenzura uyu mujyi kuva mu mpera za Mutarama uyu mwaka nyuma yo kuwirukanamo ihuriro ry’ingabo za Leta ya Repubulika Iharanira Demokarasi ya Congo.
Umuvugizi wa M23, Lawrence Kanyuka yabwiye BBC Gahuzamiryango kuri telefone ati: “Simbona ikibazo na kimwe” ku kuba Joseph Kabila yaba ari i Goma.
Kanyuka yakomoje ku ngingo ya 30 y’itegekonshinga rya DRC, avuga ko umuturage wese w’icyo gihugu afite uburenganzira bwo kujya aho ashaka no kwisanzura mu ngendo.
Ati: “Perezida Joseph Kabila ni umuturage wa RDC cyo kimwe nanjye kandi simbona impamvu [kuba yaba ari i Goma] bikwiye guteza ikibazo na kimwe.”
Ingingo ya 30 y’itegekonshinga rya DRC ryo mu 2006, nkuko ryavuguruwe mu 2011, ivuga ko “umuntu wese uri ku butaka bw’igihugu afite uburenganzira bwo kuhakorera ingendo mu bwisanzure, kuhatura, kuhava no kuhagaruka, mu buryo buteganywa n’amategeko.
“Nta Munye-Congo n’umwe ushobora kwirukanwa ku butaka bwa Repubulika, guhatirwa guhunga, [no] guhatirwa gutura ahatari iwe hasanzwe.”
Kinshasa ishinja Kabila wamaze imyaka 18 ku butegetsi kugeza asimbuwe na Perezida Félix Tshiseked mu 2019 nyuma y’amatora yanenzwe kubamo uburiganya kuba ari we uri inyuma y’umutwe wa M23, ibyo we ahakana.
RDC yongeye gushimangira ibirego byayo kuri Kabila biciye mu muvugizi wa Guverinoma wayo, Patrick Muyaya wavuze ko kuba ari i Goma bishimangira ko ari umwanzi w’igihugu.
