Mu karere ka Ngororero, ku mugoroba wo kuri iki Cyumweru tariki 22 Kamena 2025, habaye impanuka ikomeye ubwo imodoka yo mu bwoko bwa Toyota Hiace yavaga ku Kabaya yerekeza mu isantere ya Ngororero, igwa mu mugezi wa Nyahene uherereye mu Murenge wa Hindiro, Akagari ka Runyinya.
Iyo modoka yari itwaye abantu 18, bose bakaba barakomeretse ubwo iyo mpanuka yabaga. Abari bayirimo bavugaga ko imodoka yagiye ihubuka mu muhanda uri ku gasozi, maze umushoferi ananirwa kuyihagarika, igahita ishatse umuhanda igwa mu mugezi.
Polisi y’u Rwanda yahise itabara vuba, ihagera mu gihe gito nyuma y’impanuka, aho yahise itangira ibikorwa by’ubutabazi. Abakomeretse bajyanywe byihuse ku bitaro bya Kabaya kugira ngo bitabweho n’abaganga.
Kugeza ubu, inzego z’umutekano zatangiye iperereza ngo hamenyekane icyateye impanuka, cyane cyane niba byaba bifitanye isano n’umuvuduko ukabije, uburangare bw’umushoferi, cyangwa imiterere y’umuhanda.
Ubuyobozi bw’akarere ka Ngororero bwihanganishije inkomere n’imiryango yabo, bunasaba abatwara ibinyabiziga bose gukomeza kwitwararika ku mihanda, cyane cyane ahantu hari imisozi n’imihanda igoramye, hagamijwe kwirinda impanuka nk’iyi.
Turacyakomeza gukurikirana iby’iyi nkuru.
