Ikipe ya Rayon Sports yatangaje imvune Muhire Kevin yagize ndetse izatuma amara igihe kinini hanze y’ikibuga.
Tariki 4 Mutarama 2025, ikipe ya Rayon Sports yakinnye umukino n’ikipe ya Police FC urangira ikipe ya Rayon Sports itsinze Police FC ibitego 2-0. Muri uyu mukino Muhire Kevin yagize imvune asohoka mu kibuga ku munota wa 22 w’igice cya mbere.
Ikipe ya Rayon Sports yategereje kubanza kunyuza mu cyuma Muhire kevin kugirango harebwe imvune uyu mukinnyi yagize. Byari biteganyijwe ko ku munsi w’ejo hashize tariki 6 mutarama 2025, ari bwo aranyura mu cyuma ndetse byaranakozwe.
Abaganga ba Rayon Sports baje gusanga Muhire Kevin yaragize imvune y’imikaya yo mu itako. Iyi mvune abaganga bavuga ko iyo wayigize nibura umara hanze y’ikibuga hagati y’ibyumweru 4 na 6 bitewe ni uko bakwitayeho mu buryo bukomeye.
Impamvu iyi mvune akenshi itindi ni uko itajya ibagwa ahubwo icyo abaganga bagukorera ni Massage kugirango inyama zongere gufata ku magufwa.
Ikipe ya Rayon Sports izakina imikino nibura itari munsi 5, idafite Kapiteni wayo wa mbere bivuze ko igitambaro kizasigaranwa na Ombarenga Fitina mu gihe yabanje mu kibuga cyangwa Serumogo Ally.
Muhire Kevin asize ikipe ya Rayon Sports iri ku mwanya wa mbere n’amanota 33 mu gihe isigaje umukino umwe gusa wa Mukura VS kugirango imikino ibanza ya shampiyona ( Phase Aller) irangire.
