Ikipe ya APR FC n’iya Rayon Sports zizahagararira u Rwanda mu marushanwa Nyafurika muri uyu mwaka w’imikino wa 2025/26, zizahabwa ibihumbi 100$ (arenga miliyoni 143 Frw).
Kuva mu 2024, Impuzamashyirahamwe y’Umupira w’Amaguru muri Afurika (CAF) yatangiye guha ubufasha amakipe yose akina amarushanwa yaryo kuva mu ijonjora ry’ibanze.
Ku ikubitiro, APR FC na Police FC zitabiriye mu mwaka w’imikino ushize, zombi zahawe ibihumbi 50$.
Muri uyu mwaka w’imikino wa 2025/26, biteganyijwe ko CAF izaha buri kipe izitabira amarushanwa yayo ibihumbi 100$ (ni ukuvuga agera kuri miliyoni 143 Frw).
APR FC izahagararira u Rwanda muri CAF Champions League naho Rayon Sports izaruhagararira muri CAF Confederation Cup.
Imikino ibanza y’ijonjora rya mbere izakinwa tariki 19-21 Nzeri naho iyo kwishyura ikinwe tariki 26-28 Nzeri 2025.
